नोकरी इच्छुक बेरोजगारांना आधार क्रमांक लिंक करण्याचे आवाहन
शासनाच्या जिल्हा कौशल्य विकास, रोजगार व उद्योजकता
मार्गदर्शन केंद्रात नोकरीसाठी नाव नोंदणी केलेल्या बेरोजगारांना सेवा-सुविधा ऑनलाईन
पद्धतीने वेबसाईट मार्फत देण्यात येतात. राज्यात आयोजित करण्यात येत असलेल्या विविध
रोजगार मेळाव्याची माहिती मिळवून त्यासाठी प्राधान्यक्रमाने नोंद करून रोजगार प्रोत्साहन
कार्यक्रम योजनेंतर्गत प्रशिक्षणार्थी म्हणून सहभाग मिळवणे. केंद्र व राज्य शासनामार्फत
राबविण्यात येणाऱ्या विविध कौशल्य विकास योजना व कौशल्य प्रशिक्षण संस्थांची माहिती
प्राप्त करून सहभाग घेणे. तसेच शैक्षणिक पात्रता, पत्ता, संपर्क क्रमांक, ई-मेल अशाप्रकारची
वैयक्तिक माहिती दुरुस्ती करणे व उद्योजकांनी वेळोवेळी अधिसूचित केलेल्या रिक्त पदांची
माहिती मिळवून त्यासाठी उमेदवारी अर्ज सादर करणे या बाबींचा समावेश करण्यात आला आहे.
उद्योजकांच्या मागणीनुसार याद्यांमध्ये नावाचा
समावेश होण्यासाठी व शासनाच्या योजनांचा लाभ मिळवण्यासाठी बेरोजगार उमेदवारांच्या नोंदणीस
आधार क्रमांक लिंक असणे आवश्यक आहे. त्यामुळे प्रत्येक नोकरी इच्छुक उमेदवारांनी शासनाच्या
जिल्हा कौशल्य विकास, रोजगार व उद्योजकता मार्गदर्शन केंद्रात ऑनलाईन पद्धतीने आधार
क्रमांक लिंक करावा. अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन
केंद्र (मुंबई शहर), १७५, पहिला मजला, दादाभाई नवरोजी मार्ग, फोर्ट मुंबई ४००००१ या
पत्त्यावर अथवा ई-मेल asstdiremp.mumcity@ese.maharashtra.gov.in अथवा दूरध्वनी क्र.
०२२-२२६२६३०३ या क्रमांकावर संपर्क साधावा असे आवाहन केंद्र सहाय्यक आयुक्त छाया कुबल
यांनी केले आहे.
Comments
Post a Comment